Як подполковник ва 5 сарбоз, ки дар робита ба латукӯби наваскарон ва нашри навори он дар шабакаҳои иҷтимоӣ, як моҳ пештар боздошт шуда буданд, бо қарори Колегияи ҳарбии Додгоҳи олии Тоҷикистон аз 9,5 то 11,5 сол равонаи зиндон шудаанд.

Ба ифтихори 29 –умин солгарди таъсисёбии Қӯшунҳои сарҳадии Кумитаи давлатии амнияти миллии Тоҷикистон ва Рӯзи сарҳадбонони тоҷик Нусратулло Салимзода, Раиси ноҳияи Бобоҷон Ғафуров ба қисми ҳарбии Раёсати Қӯшунҳои сарҳадии Кумитаи давлатии амнияти миллии Тоҷикистон дар вилояти Суғд, ки дар ҳудуди ноҳия воқеъ мебошад, ташриф оварда, афсарону сарбозони қӯшунҳои сарҳадиро ба муносибати Рӯзи сарҳадбонони тоҷик муборакбод намуд.

Таъкид гардид, ки 28 –уми майи соли 1994 дар сохтори мақомоти амнияти кишвар бо мақсади таъмин намудани назорати сарҳади давлатӣ ва пешгирии воридшавии ҳамагуна унсурҳои террорристиву экстремистӣ, ҳамчунин қӯчоқи маводи мухаддир Қӯшунҳои сарҳадӣ таъсис дода шуданд. Аз он рӯз эътиборан ҳамасола ин санаи таърихӣ ҳамчун Рӯзи сарҳадбонони тоҷик дар қаламрави кишвар қайд карда мешавад.

- Имрӯзҳо дар қаламрави ноҳия дар қатори дигар хизматчиёни ҳарбии сохторҳои низомӣ ва ҳайати шахсии мақомоти ҳифзи ҳуқуқ, қисми ҳарбии Раёсати Қӯшунҳои сарҳадии Кумитаи давлатии амнияти миллии Тоҷикистон дар вилояти Суғд фаъолияти назаррас дошта, онҳо дар таъмини сулҳу суботи устувор, амнияти кишвар, таҳкими ваҳдати миллӣ ва пешрафти кишварамон саҳми арзишманд мегузоранд. Ҳоло Қӯшунҳои сарҳадии мо ба як сохтори аз лиҳози техникӣ муҷаҳҳазу муосир, сипари боэътимоди ҳифзи марзу буми кишвар табдил ёфта, он яке аз дастовардҳои даврони соҳибистиқлолии кишвар ба шумор меравад. Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар суханрониҳо борҳо қайд намудаанд, ки «…мо бо сарҳадбонони худ ифтихор менамоем, зеро онҳо марзу буми сарзамини, яъне амнияту суботи давлат ва оромию осоиши ҷомеаро бо ҳисси баланди миллӣ ва эҳсоси гарми ватандӯстӣ таъмин карда истодаанд.» Боварӣ дорам, ки сарҳадбонони мо минбаъд низ ба хотири ҳифзи амният ва осоишу оромии марзҳои муқаддаси давлатӣ ва мардуми шарифи он бо ҳушёриву зиракӣ, эҳсоси баланди ватандӯстӣ кӯшиш менамоянд, - илова намуд, Раиси ноҳия.

Дар чорабинии тантанавӣ Анвар Яқубӣ, муовини Раиси вилояти Суғд, иштирок намуда, Паёми табрикии Раиси вилояти Суғд Раҷаббой Аҳмадзодаро ба афсарону сарбозон ва кулли сарҳадчиён расонид. Ҳамзамон дар ин тантана дигар роҳбарони Мақомоти ҳифзи ҳуқуқ низ иштирок намуданд.

Дар ин рӯз чанд нафар пешсафони соҳа бо Сипосномаи Мақомоти иҷроияи ҳокимияти давлатии ноҳияи Бобоҷон Ғафуров қадрдонӣ гардиданд.

Дафтари матбуот ва иттилооти Мақомоти иҷроияи ҳокимияти давлатии ноҳияи Бобоҷон Ғафуров

Бахшида ба Рӯзи ҷавонон дар хиёбони назди Қасри фарҳанги ноҳия чорабинии бошукӯҳ доир гардид. Иҷрокунандаи вазифаи Раиси ноҳия Нусратулло Салимзода Номаи шодбошии Мақомоти иҷроияи ҳокимияти давлатии ноҳияро бахшида ба Рӯзи ҷавонон қироат намуда, ҳозиринро шодбош гуфт. Дар ин самт маросими супоридани Стипендияҳои Раиси ноҳия барои соли хониши 2022-2023-юм ба 60 нафар хонандагони Муассисаҳои таҳсилоти миёнаи умумӣ, Литсейи касбӣ-техникӣ, донишҷӯёни Коллеҷи тиббӣ, хонандагони Мактаби санъат ва варзишгарон баргузор гардид. Иҷрокунандаи вазифаи Раиси ноҳия Нусратулло Салимзода изҳор дошт, ки ҷавонони кишвар, аз ҷумла, ҷавонони ноҳияи Бобоҷон Ғафуров дар таҳкими пояҳои давлатдорӣ, рушди босуботи ҷомеа ва пешбурду татбиқи сиёсати созандаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, Мақомоти иҷроияи ҳокимияти давлатии вилоят ва ноҳия нақши муҳим доранд. Сипас дар вазъияти тантанавӣ ба 60 нафар хонандагону донишҷӯёни макотиби олӣ, Коллеҷу мактабҳои миёна  стипендияи Раиси ноҳия супорида шуд. Барномаи консертӣ аз ҷониби масъулини бахши фарҳанги Мақомоти иҷроияи ҳокимияти давлатии ноҳия омода шуда, пешкаши ҳозирин гардид, ки дар он санъаткорону сарояндагон ва хонандагони литсейю мактабҳои ноҳия бо суруду таронаҳои дилангез баромад намуданд ва он фарогири тараннуми саодати ҷавонӣ, ҳувияти ватандорӣ, садоқат ба Ватани соҳибихтиёр ва Пешвои муаззами миллат буд. 

Раиси вилоят Раҷаббой Аҳмадзода ба муносибати Рӯзи ҷавонони Тоҷикистон як қатор ҷавонони маъюбу беморро аёдат карда, Рӯзи ҷавононро ба онҳо табрик гуфт.