Ҷавонон

    Мулоқоти навбатии гурӯҳи тарғиботӣ бо сокинони Шамсобод ва баррасии масоили мубрами рӯз

    Дар доираи ташаббуси “Деҳа ба деҳа” силсилаи мулоқотҳои судманди мақомоти иҷроияи ҳокимияти давлатии ноҳияи Бобоҷон Ғафуров бо сокинони деҳот идома дорад. Ин иқдом, ки ҳадафи наздиктар овардани ҳукумат ба мардум ва ҳалли мушкилоти ҷойдоштаро дорад, баҳри таҳкими ҳамкориҳо ва баланд бардоштани сатҳи огоҳии ҷомеа мусоидат мекунад.

   Рӯзи гузашта гурӯҳи тарғиботии назди мақомоти иҷроияи ҳокимияти давлатии ноҳияи Бобоҷон Ғафуров бо иштироки муовини раиси ноҳия Акбар Юсуфӣ, мудири бахши кор бо ҷавонон ва варзиш Баҳриддин Баҳодурзода ва сармутахассиси бахши кор бо дин, танзими ҷашну маросим Улуғбек Темиров бо сокинони деҳаи Шамсободи деҳоти Исмоил мулоқот намуданд.

Меҳвари суҳбат: Аз дастурҳои Пешвои миллат то масъулияти шаҳрвандӣ

    Намояндагони мақомот дар ин вохӯрӣ масъалаҳои муҳим ва доғи рӯзро мавриди баррасӣ қарор доданд. Меҳвари суҳбат дастуру тавсияҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон зимни сафари охирини кориашон ба ноҳияи Бобоҷон Ғафуров буд. Таъкид гардид, ки дар арафаи таҷлили 35-солагии Истиқлоли давлатии Ҷумҳурии Тоҷикистон, аҳамияти ободониву созандагӣ, тарбияи насли наврасу ҷавон дар рӯҳияи меҳнатдӯстӣ ва ватанпарварӣ хеле муҳим аст. Ҳамчунин, тарғиботчиён аҳамияти эҳтиромгузорӣ ба қонунҳои амалкунанда, аз ҷумла қонунҳои масъулият дар таълиму тарбияи кӯдакон, танзими ҷашну маросим, вазифаҳои ҷавонписарон дар адои хизмати ҳатмии ҳарбӣ, маданияти истифодабарии телефонҳои мобилӣ ва корбарӣ бо шабакаҳои иҷтимоӣ, пешгирии шомилшавии ҷавонон ба ҳизбу ҳаракатҳои иртиҷоии экстремистиву террористӣ, мубориза бо коррупсия ва оқибатҳои он, фарҳанги оиладорӣ ва риояи либоспӯшии миллӣ, хушунати хонаводагӣ ва фарогирии шаҳрвандони бекор бо шуғли пурмаҳсулро ба таври амиқ фаҳмониданд.

Тағйироти нав дар қонунгузорӣ: Ҷавобгарӣ барои истифодаи ғайриқонунии барқ

    Дар ин мулоқот ба сокинон иттилоъ дода шуд, ки ба Кодекси ҳуқуқвайронкунии маъмурии Ҷумҳурии Тоҷикистон ва Кодекси ҷиноятии Ҷумҳурии Тоҷикистон аз 15 апрели соли ҷорӣ тағйиру иловаҳо ворид карда шудаанд. Аз ин пас, нисбати муштариёну истифодабарандагони қувваи барқ, ки ба қонунвайронкуниҳо роҳ медиҳанд, ҷазоҳои маъмурӣ ва ҷиноятӣ татбиқ карда мешавад.

    Бахусус таъкид гардид, ки ҷавобгарӣ барои истифодаи ғайриқонунии нерӯи барқ ва напардохтани маблағи он пурзӯр карда шуда, аз ҷумла, ҷавобгарии ҷиноятӣ то маҳрум намудан аз озодӣ ба муҳлати то 10 сол пешбинӣ шудааст. Ин тағйирот ба хотири таъмини истифодаи самаранок ва одилонаи захираҳои энергетикӣ равона гардидааст.

     Мулоқоти "Деҳа ба деҳа" бори дигар собит намуд, ки робитаи мустақим бо мардум ва муколамаи ошкоро калиди ҳалли мушкилот ва рушди устувори ҷомеа мебошад. Чунин ташаббусҳо барои таҳкими ваҳдати миллӣ ва пешрафти кишвар заминаи мусоид фароҳам меоваранд.

Хабарнигори “Парвозгоҳи бузургон”

         Дар ноҳияи Бобоҷон Ғафуров рӯйдоди фарҳангии хотирмон таҳти унвони "Тоҷикона мепӯшем" баргузор гардид. Иқдоми мазкур, ки бо ташаббуси Мақомоти иҷроияи ҳокимияти давлатии ноҳия ва шуъбаи кор бо занон ва оила роҳандозӣ шуд, дар фазои идонаи минтақаи истироҳатии "Азизи дил" воқеъ дар ҷамоъати деҳоти Ғозиён ҷараён гирифт ва шумораи зиёди кӯдакон, занону духтарон, ҳунармандону фаъолзанон, ҳофизону навозандагонро гирди ҳам овард.

     Дар аксияи фарҳангӣ-тарғиботӣ Зайнура Азимӣ, муовини раиси вилояти Суғд, Дилоромхон Турсунзода, муовини Раиси ноҳияи Бобоҷон Ғафуров ва Хуршедахон Хоҷазода, сардори Раёсати кор бо занон ва оилаи вилояти Суғд иштирок намуда, дар бораи аҳамияти либоси миллӣ дар ҳифзи арзишҳои фарҳангӣ ва таърихии миллат суханронӣ карданд.  Таъкид гардид, ки либоси миллии тоҷикӣ ҳамчун як ҷузъи муҳими фарҳанги миллӣ мероси гаронбаҳоест аз аҷдодони бузургамон ва эҳтиром гузоштан ба он на танҳо арҷгузорӣ ба таърих, балки баланд бардоштани маърифати насли ояндасози кишвар низ мебошад.

    Аксияи "Тоҷикона мепӯшем" бо барномаҳои рангини ҳунарӣ, намоиши либосҳои миллӣ ва сурудҳои дилнишини ҳофизону навозандагон ҳусни дигар зам намуда, дар хотири иштирокчиён нақши гузошт. Чунин иқдомҳои фарҳангӣ дар оянда низ идома ёфта, дар таҳкими эҳсоси ватандорӣ ва арҷгузорӣ ба мероси миллии мардуми тоҷик саҳми босазо хоҳанд гузошт.

Ӯғулой Ҳоҷибоева, мудири шуъбаи кор бо занон ва оилаи Мақомоти иҷроияи ҳокимияти давлатии ноҳияи Бобоҷон Ғафуров.

       Кӯдак - ин оғози ҳаёт аст. Ҳар як кӯдак новобаста аз нажод, ҷинс, забон, дин, вазъи иҷтимоӣ ва саломатӣ дорои ҳуқуқҳои фитрӣ ва пойдор мебошад, ки ҷомеа ва давлат уҳдадоранд онҳоро эҳтиром ва таъмин намоянд. Ҳуқуқи ҳифзи кӯдак маҷмӯи меъёрҳои ҳуқуқиест, ки ҳаёти солим, рушди ҳамаҷониба, таъмини амният, таълим, тандурустӣ ва ҳимоя аз ҳама гуна зӯроварӣ, истисмор ва беэътиноиро барои кӯдакон кафолат медиҳад.

Аҳамияти ҳуқуқи ҳифзи кӯдак ниҳоят бузург аст, зеро:

Таъмини зиндагии арзанда: Ҳуқуқи ҳифзи кӯдак заминаи зиндагии арзандаро барои нашъунамои ҷисмонӣ, ақлӣ, маънавӣ ва иҷтимоии кӯдакон фароҳам меорад. Кӯдаконе, ки аз ғамхорӣ, ғизои солим, таҳсилоти босифат ва муҳити бехатар бархурдоранд, имконияти бештаре барои табдил шудан ба шахсиятҳои комил ва муваффақ пайдо мекунанд.

Рушди ҷомеа: Кӯдакони имрӯза - бунёдкорони фардои ҷомеа мебошанд. Ҳимоя ва сармоягузорӣ ба рушди онҳо сармоягузорӣ ба ояндаи устувор ва шукуфони ҳар як миллат аст. Ҷомеае, ки ба ҳуқуқҳои кӯдакон эҳтиром мегузорад, дорои нерӯи инсонӣ ва қобилияти бузург барои пешрафт мебошад.

Пешгирии оқибатҳои манфӣ: Нақзи ҳуқуқи кӯдакон, аз қабили зӯроварӣ, истисмори меҳнатӣ, беэътиноӣ ва таҳсилоти нокифоя, метавонад ба оқибатҳои ҷиддии ҷисмонӣ ва равонӣ оварда расонад, ки дар тамоми умри кӯдак таъсири манфӣ мегузорад. Ҳимояи ҳуқуқҳои кӯдакон инчунин пешгирии ҷинояткорӣ, нашъамандӣ ва дигар зуҳуроти номатлубро дар ҷомеа мусоидат мекунад.

Арзишҳои инсонӣ: Эҳтиром ба ҳуқуқҳои кӯдакон инъикоси арзишҳои бунёдии инсонӣ, аз қабили адолат, баробарӣ, шафқат ва масъулият мебошад. Ҳимояи кӯдакон вазифаи ахлоқӣ ва инсонии ҳар як фарди ҷомеа аст.

Манфиатҳои таъмини ҳифзи ҳуқуқи кӯдак барои ҷомеа бениҳоят зиёд аст:

Насли солим ва бомаърифат: Таъмини ҳуқуқи кӯдакон ба тандурустии ҷисмонӣ ва равонии онҳо, инчунин дастрасӣ ба таҳсилоти босифат мусоидат мекунад, ки дар натиҷа насли солим, бомаърифат ва қобилиятнок ба воя мерасад.

Ҷомеаи адолатпарвар: Ҷомеае, ки дар он ҳуқуқҳои ҳамаи аъзоён, аз ҷумла кӯдакон, эҳтиром карда мешаванд, ҷомеаи адолатпарвар ва устувор хоҳад буд.

Иқтисоди пешрафта: Сармоягузорӣ ба рушди кӯдакон дар дарозмуддат ба афзоиши иқтисодӣ ва беҳтар шудани сатҳи зиндагии тамоми ҷомеа мусоидат мекунад. Кӯдакони имрӯза мутахассисони ояндаи кишвар хоҳанд буд.

Коҳиши мушкилоти иҷтимоӣ: Таъмини ҳуқуқи кӯдакон метавонад сатҳи ҷинояткорӣ, бекорӣ, нашъамандӣ ва дигар мушкилоти иҷтимоиро дар ҷомеа коҳиш диҳад.

Дар Ҷумҳурии Тоҷикистон масъалаи ҳифзи ҳуқуқи кӯдак яке аз самтҳои муҳимтарини сиёсати давлатӣ ба шумор меравад. Қонунгузории кишвар ба стандартҳои байналмилалӣ мутобиқ гардонида шуда, барои таъмини ҳуқуқ ва манфиатҳои кӯдакон чораҳои зарурӣ андешида мешаванд.

Ҳар як фарди ҷомеа, аз волидайн сар карда то мақомоти давлатӣ, бояд дар ҳимояи ҳуқуқҳои кӯдакон масъулиятшинос бошад. Танҳо бо саъю талоши муштарак мо метавонем барои кӯдакони худ ояндаи дурахшон ва зиндагии арзандаро таъмин намоем. Биёед, дар ин роҳи пуршараф якҷоя қадам гузорем ва фаромӯш насозем, ки кӯдакон на танҳо ояндаи мо, балки сарвати бебаҳои имрӯзаи мо низ мебошанд, ки ҳифз ва парастории онҳо вазифаи муқаддаси ҳар яки мост.

Фахриддин Болтуев, мудири бахши ҳифзи ҳуқуқи кӯдак дар ноҳияи Бобоҷон Ғафуров