Бо мақсади фароҳам овардани шароитҳои мусоиди таъминоти фарзандон бо либосҳои мактабӣ ва ашёи хониш ҳамасола дар арафаи истиқболи соли нави таҳсил ташкил намудани ярмаркаи мактабӣ ба ҳукми анъанаи нек даромадааст.

Тибқи талаботи Низомномаҳои муассисаҳои таҳсилотии кишвар ва Дастуруламали Вазорати Маориф ва илми Ҷумҳурии Тоҷикистон “Оид ба либосҳои ягонаи мактаббачагон” санаи 15.08.2019 дар маркази ноҳияи Бобоҷон Ғафуров ярмаркаи фурӯши лавозимоти хониш ва либоси мактабӣ ташкилу баргузор карда шуд.

Дар маросими ифтитоҳи фурӯшгоҳ муовини Раиси ноҳияи Бобоҷон Ғафуров Комилӣ М.М. иштирок ва суханронӣ намуд. Зикр карда шуд, ки соҳаи маориф натанҳо яке аз соҳаҳои асосӣ ва афзалиятноки сиёсати давлатии Ҷумҳурии Тоҷикистон мебошад, балки он пояи муҳимтарини давлатдории миллӣ, омили таъминкунандаи рушди устувори давлат ва шарти асосии пешрафти ҷомеа ба ҳисоб меравад. Аз оғози Истиқлолияти давлатӣ то имрӯз Ҳукумати Ҷумҳурии Тоҷикистон ҳама саъйю талоши худро барои рушду инкишофи ин соҳаи муҳими ҷомеа равона кардааст. Дар Паёми имсолаи худ ба парлумони кишвар Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон таъкид доштанд, ки: «Мо ин корҳоро барои худамон, яъне ба хотири баланд бардоштани сатҳи маърифат ва тавсеаи ҷаҳонбинии наврасону ҷавонони кишвар мекунем, на бо мақсади дигар».

Раиси Ҷамоати шаҳраки Ғафуров Ҳакимов Ҳ.В., омӯзгорон ва волидайне, ки дар чорабинӣ иштирок карданд, зимни суханрониҳои худ иқдоми созандаи мақомоти маҳаллии ҳокимияти давлатиро ҷиҳати фароҳам овардани шароитҳои мусоиди таъминоти толибилмон бо либосҳои мактабӣ ва ашёи хониш баён доштанд.

Барномаи рангини фарҳангӣ бо намоиши либосҳои мактабиён оғозбахши соли нави хониш ва ярмаркаи фурӯши лавозимоти хониш ва либоси мактабӣ гардид.