ТАҲКИМИ МАЪРИФАТ ВА МАСЪУЛИЯТ
Вохӯрии “Деҳа ба деҳа” дар Ёва
Дар доираи нақшаи муштараки Мақомоти иҷроияи ҳокимияти давлатии ноҳияи Бобоҷон Ғафуров ва Кумитаи иҷроияи Ҳизби Халқии Демократии Тоҷикистон, вохӯрии муҳими тарғиботӣ бо усули “Деҳа ба деҳа” дар маҳаллаи «Наддофон»-и ҷамоати деҳоти Ёва баргузор гардид. Мақсад аз он баланд бардоштани масъулияти шаҳрвандон, бахусус ҷавонон, дар равандҳои дохилию хориҷии кишвар мебошад.
Дар мулоқот намояндагони сохторҳои мухталифи давлатӣ ва ҷамъиятӣ: Шамсиддинов Сорбон намоянда аз КДАМ ҶТ дар ноҳияи Бобоҷон Ғафуров, Уғулой Ҳоҷибоева мудири шуъбаи кор бо занон ва оилаи назди мақомоти иҷроияи ҳокимияти давлатии ноҳия, Баҳриддин Баҳодурзода, мудири бахши кор бо ҷавонон ва варзиши ноҳия, Муяссара Солиева, мудири бахши кор бо занон ва оилаи КИ ҲХДТ дар ноҳия, вакили Маҷлиси вакилони халқ Мадина Турсунзода иштирок ва суханронӣ намуданд. Зимни суҳбат татбиқи қонунҳои ҶТ “Дар бораи танзими ҷашну маросим дар ҶТ” ва “Дар бораи масъулият барои таълиму тарбияи кӯдак” хатарҳои терроризм ва экстремизм, эҳтиёткорӣ, пешгирии шомилшавии ҷавонон ба ҳизбу ҳаракатҳои ифротӣ, таҳкими одоби оиладорӣ, эҳтиёт ва ҳифзи арзишҳои оиладорӣ, эҳтиёткорӣ дар муҳоҷирати меҳнатӣ, ҷалби ҷавонон ба хизмати ҳарбӣ мавриди баррасӣ қарор гирифтанд.
Мулоқот бо як фазои озоди муколама ва саволу ҷавоб анҷом ёфт, ки ба мардум имконияти мустақим барои ибрози андеша ва гирифтани ҷавобҳои муфассалро фароҳам овард. Мардуми маҳаллӣ ташкили чунин вохӯриҳоро хеле муҳим ва саривақтӣ арзёбӣ намуда, аз масъулин барои таваҷҷӯҳи онҳо изҳори сипос карданд. Ин гуна чорабиниҳо на танҳо маърифати ҳуқуқиро боло мебаранд, балки боиси таҳкими ҳамкории байни мақомоти давлатӣ ва ҷомеа мегарданд.
“Парвозгоҳи бузургон”
