Муборакбодии и.в Раиси ноҳияи Бобоҷон Ғафуров Нусратулло Салимзода ба муносибати Иди Наврўз -2023
Ҳамдиёрони азиз!
Имрўзҳо дар саросари кишвари мо бо фаро расидани фасли гулу эҳёи табиат соли нави аҷдодии миллати куҳанбунёди тоҷик - Наврўзи Аҷам таҷлил мегардад.
Кулли сокинони ноҳияи Бобоҷон Ғафуров ва тамоми ҳамдиёрони азизамонро бо фарорасии иди бостонии Наврўз, ки воқеан соли нави мардуми мо мебошад, самимона табрик гуфта, хуррамиву сарсабзии наврўзӣ, баҳори неку файзбор, тандурустиву саодати рўзгор ва муваффақияту комёбиҳо орзу менамоям.
Боиси хушнудӣ ва сарфарозии ҳамаи мост, ки ҷашни деринаи ниёгони мо - Наврўзи хуҷастапай бо пешниҳоди Ҳукумати Ҷумҳурии Тоҷикистон дар саросари ҷаҳон бо шукўҳу шаҳомати хоса таҷлил шуда, ҳамчун иди байналмилалӣ эътироф гардидааст. Маҳз азму иродаи матини халқ ва пуштибонии ҳамаи мардум аз сиёсати пешгирифтаи Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон, инчунин асолати фарҳангдўстӣ ва ваҳдатгароиву сулҳпарварии миллати шарафманди тоҷик ва фарзандони бонангу номуси он буд, ки мо ба чунин рўзҳои нек ва рўзгори осуда расидем. Наврўз чун ифодагари сулҳу оромӣ, пиндору гуфтору кирдори нек ва дўстиву ҳамкории халқҳо моро боз сўи рўзгори бехушунат, сулҳу субот ва кўшиш барои зиндагии орому осуда раҳнамоӣ мекунад.
Бино ба ҳидоятҳои Раиси вилояти Суғд муҳтарам Раҷаббой Аҳмадзода идома бахшидан ба суннатҳои неки аҷдодӣ, барои баланд бардоштани сатҳи маърифати ҷавонон, таблиғи меҳнату зиндагии солим, густариши рафтору ахлоқи ҳамида, бузургдошти анъанаҳои неки ниёгон, ватандўстиву ифтихори миллӣ ва пешрафту шукуфоии кишвари азизамон мусоидат мекунад.
Мувофиқи анъанаҳои неки наврўзӣ бо фарорасии фасли баҳор дар ҳар хонадони мардуми тоҷик айёми кишту кор ва намуди идона бахшидан ба шаҳру деҳот оғоз мегардад. Имрўзҳо дар саросари ноҳия корҳои ободонию бунёдкорӣ авҷ гирифтааст ва шубҳае нест, ки мардуми сарбаланди ноҳияи Бобоҷон Ғафуров бо илҳоми наврўзӣ ба кору фаъолияти ватандўстонаи худ суръати тоза мебахшанд.
Бигзор дар кишвари соҳибистиқлоли мо, ки баҳори файзбораш доимӣ гулафшон аст, сулҳу ваҳдат абадан ҳукмфармо бошад.
Наврӯзатон фархундаву муборак бод, ҳамдиёрони азиз!
